lajmet me te reja ne KOSOV DHE NE GJITH BOTEN .

• Demonstrata ka për qëllim që t’i bëhet thirrje UNMIK për lirimin nga burgu të udhëheqësit të lëvizjes, Albin Kurti. Po ashtu iu behet thirrje organizmave ndërkombëtare për dhënien e plotë të pavarësisë për Kosovën

Lëvizja “Vetëvendosja” zhvillon sot në Prishtinë një protestë të paralajmëruar, e cila pritet të jetë paqësore. Qëllimi i protestës është të shprehet kerkesa e aktivistëve për të drejtën e vetëvendosjes së popullit të Kosovës. Po kështu demonstruesit kërkojnë lirimin e menjëhershëm të kreut të kësaj lëvizjeje, Albin Kurtit që mbahet ende i burgosur që nga protesta e dhunshme e 10 shkurtit, ku gjetën vdekjen dy qytetarë. Gjithashtu ata do të kërkojnë edhe lirimin e gjithë të burgosurve të tjerë politikë, kryesisht anëtarë të kësaj lëvizjeje. Protesta do të nisë rreth orës 14:00 në qendër te Prishtinës, ndërkohë që autoritetet e UNMIK-ut kanë marrë masa për të siguruar një demonstrim paqesor..

• Kombëtarja shqiptare merr një barazim të madh 0-0 në Sofje përballë Bullgarisë së Stoiçkov

Skuadra e zbritur në fushë nga Oto Bariç ka luajtur një 90 minutësh të madh, teksa ka qenë perfekte në të gjithë repartet. Një sfidë e përgatitur më së miri nga trajneri kroat, që me rikthimin e tij në pankinë i dha një impuls më shumë skuadrës. Shqipëria bëri të heshtë Stoiçkov, një trajner që para ndeshjes kishte deklaruar se kombëtarja kuqezi duhej mbaruar për 10 minuta, por që në të vërtetë u detyrua të përballej me fishkëllimat e tifozëve të tij në fund të ndeshjes. 35 mijë të pranishmit në “Vasil Levski” nuk kanë qenë aspak dakord me këtë barazim, ndërsa festa ka qenë vetëm e 200 shqiptarëve.
Shqipëria ka luajtur një nga ndeshjet më të mira të saj, duke treguar siguri në repartin më problematik, ndërsa Erjon Bogdani ka qenë njeriu i kudondodhur në këtë ndeshje, duke fituar në fund edhe komplimentat e Oto Bariç. Pika e marrë në Sofje e lë Shqipërinë sërish në vendin e parafundit, por morali i skuadrës shqiptare tani është një tjetër. Në qershor luhen dy takime ndaj Luksemburgut dhe që tani mund të imagjinohen 6 pikë që do ta ngjisnin Shqipërinë disa vende në renditje. Barazimi në Sofje mund të quhet historik edhe për faktin se u arrit ndaj një skuadre të përbërë nga yje si Berbatov, Bojinov apo Stilian Petrov.
Ndonëse ka qenë një gjykim thuajse perfekt, nuk mund të mohohen dy pozicione jashtë loje të dhëna gabimisht nga arbitri anësor dhe mosnxjerrja e një kartoni të kuq ndaj bullgarit Vagner, që goditi me shkelm Nevil Deden. Megjithatë misioni në Bullgari u arrit dhe kombëtarja shqiptare duket se ka bërë kthesën. Bullgarët kanë goditur dy herë edhe shtyllën, por të dy rastet kanë qenë sporadikë dhe nuk vinin pas një presioni të vazhdueshëm të ekipit të hedhur në fushë nga Stoiçkov

Historia e tyre është e lashtë, plot 2200- vjeçare. Dhe mbart në vetvete një epokë të vjetër, atëherë kur mjetet e lundrimit ishin “armët” e vërteta të dominimit të një populli. Bëhet fjalë për dy anije ilire, reliket e të cilave janë zbuluar vetëm pak ditë më parë në Bosnje-Hercegovinë. Mbetjet e këtyre anijeve janë zbuluar vetëm tetë metra nën sipërfaqen e detit, në gjirin e parkut natyror Hutovo Blato, në jug të Hercegovinës, në afërsi të grykëderdhjes së lumit Neretva. Ato kanë qëndruar për mijëra vjet të fshehur, si për ironi, në një thellësi jo shumë të madhe, dhe kanë arritur t’i mbijetojnë gërryerjes së ujit, baticave dhe zbaticave si dhe ndryshimit të kushteve atmosferike.
Zbulimi
Gjithçka ndodhi gjatë kërkimeve të një ekipi arkeologësh nga Bosnja, përgjatë grykëderdhjes së lumit si dhe zonën e bregut të parkut natyror. Snjezhana Vasilji, drejtuesja e ekipit të arkeologëve që punonte në këtë zonë tha se dy anijet që u gjetën në zonën e quajtur Desilo kanë gjatësi 14 metra dhe gjerësi katër metra. Mjetet e lundrimit të ilirëve që dominonin detet në Ballkan kishin gjetur vend mes të dhënave historike greke dhe romake, por reliket e tyre nuk ishin zbuluar asnjëherë. Dy anijet e zbuluara pak ditë më parë janë të parat anije ilire që hedhin dritë mbi historinë e vërtetë të një popullsie të lashtë. Pjesëza nga amfora të ndryshme janë zbuluar brenda anijeve, 30 prej të cilave mbajnë shenjat e artizanëve që i kanë punuar ato. Bashkë me to janë zbuluar edhe një varkë romake si dhe rrënojat e një vile të vjetër romake aty pranë. Arkeologët kanë zbuluar edhe disa varre ilire, 8 të tilla, që janë edhe më të vjetra se anijet. Deri tani ekspertët kanë ekzaminuar vetëm tetë metra katrorë përgjatë fundit të detit dhe verifikime e kërkime të tjera duhet të bëhen për të zbuluar se çfarë ka ndodhur vërtet dhe nëse kjo ishte një pikë strehimi për piratët ilirë.
Hipoteza
Anijet ilire, që besohet se janë më të vjetra se 2 mijëvjeçare, janë të njohura për historianët dhe arkeologët vetëm nëpërmjet përshkrimeve të ndryshme, miteve dhe legjendave greke dhe romake. Por, ekzistenca e tyre fizike nuk është provuar asnjëherë në ditët e sotme. Arkeologët tani besojnë se zona e Hutovos, në grykëderdhjen e lumit Neretva ka qenë një ndër destinacionet e këtyre anijeve që lundronin nëpër detin Adriatik që është i lidhur me lumin në fjalë. Duket se piratët ilirë, pasi kanë kapur një anije greke apo romake, kanë shkuar deri në grykëderdhjen e lumit Neretva për t’u strehuar në Hutovo Blato, ku anijet e ndjekura nga persekutorët e tyre, u mbytën.
Në zonën e Desilos ku u gjetën anijet janë zbuluar disa herë amfora të vjetra, që datojnë mijëra vjet më parë. Për sa i përket ndërtesës romake që gjetur në fund të këtij territori në deltën e lumit, besohet se ajo daton në epokën e Hekurit ose të Bronzit. Arkeologët thonë se vetëm kërkimet e reja si dhe shqyrtimi me shumë hollësi i relikeve që gjetura mund të hedhë dritë mbi fakte të rëndësishme historike të ndodhura 2.200 vjet më parë. Ilirët kanë qenë banorët më të hershëm të Ballkanit Perëndimor, përfshi këtu edhe zonën e Bosnjës, shumë kohë para së perandoria romake të pushtonte rajonin dhe të merrte kontrollin e tij.
Parku
Parku natyror ku u gjetën reliket e anijeve ilire është një pasuri e vërtetë arkeologjike për Bosnjën. Ai ka një sipërfaqe prej rreth 7 mijë hektarësh dhe ka edhe gjashtë liqene të vegjël. Parlu është shumë i famshëm për praninë e 200 specieve të zogjve. Arkeologët besojnë se ky vend mban fshehur shumë relike të rëndësishme historike dhe ruhet nga policë të posaçme për të mos u bërë pre e plaçkitësve. Sipas banorëve lokalë, verën e kaluar trupat e Bashkimit Europian në Bosnjë Hercegovina (EUFOR) zbuluan dhe morën rreth 50 amfora me shumë vlerë nga ky park natyror.

ORA: Kuvendi i Kosovës nuk e trajton çështjen e bllokimit të vaksinave në pikat kufitare
“Grupi Parlamentar ORA dëshiron të shpreh shqetësimin lidhur me ndalimin në kufi të kontingjenteve të vaksinave dhe të kontingjenteve tjera që do të vijnë, thuhet në reagimin e ORA-s. Vaksinimi i obliguar i fëmijëve kundër sëmundjeve ngjitëse është e drejtë elementare e secilit fëmijë për fillimin e jetës së shëndetshme”, ka thënë Fatmire Mullhaxha Kollçaku, kryetare e Komisionit për shëndetësi të Kuvendit të Kosovës.
Në seancën e sotme plenare të Kuvendit të Kosovës, Grupi Parlamentar ORA ka ngritur problemin e ndalimit të kontingjenteve me vaksina, në pikat kufitare të vendit si pasojë e mosdoganimit të tyre. Lidhur me këtë çështje Fatmire Mullhaxha Kollçaku, kryetare e Komisionit për shëndetësi të Kuvendit të Kosovës, ka theksuar shqetësimin e Grupi Parlamentar ORA dhe ka kërkuar që kjo pikë të futet si çështje urgjente e rendit te ditës ne seancën plenare.

“Grupi Parlamentar ORA dëshiron të shpreh shqetësimin lidhur me ndalimin në kufi të kontingjenteve të vaksinave dhe të kontingjenteve tjera që do të vijnë.
T`ju përkujtoj se vaksinimi i obliguar i fëmijëve kundër sëmundjeve ngjitëse është e drejtë elementare e secilit fëmijë për fillimin e jetës së shëndetshme. Dje jemi gëzuar që disa produkte bujqësore janë liruar nga dogana, por kemi pritur që ta shohim këtë edhe për vaksinat”, ka theksuar Kollçaku.

Duke theksuar se problemi me vaksina është evident që nga qershori i vitit të kaluar, kur është vendosur dogana për vaksina, Fatmire Mullhaxha - Kollçaku ka kërkuar nga Ministria e Shëndetësisë dhe qeveria që të ndërmarrin hapa të ngutshme për evitimin e kësaj problematike.

“Problemi me vaksina është prej qershorit të vitit të kaluar, kur është vendosur dogana për vaksina, dhe në vazhdimësi kemi ndalesa për kontingjentet e vaksinave që të hyjnë në Kosovë. Në qoftë se në vitin e kaluar Ministria e Shëndetësisë nuk e ka pasur të paraparë buxhetin, sepse nuk ka ditur se ato do të doganohen, besoj që për këtë vit buxheti të jetë i paraparë ose të merret vendimi i qeverisë që vaksinat të lirohen plotësisht nga dogana. Ne mungesë të të dyja vendimeve është dashur me kohë të sigurohen mjetet dhe mos vijmë në situatë që të rrezikojmë shëndetësinë publike”, ka shtuar Kollçaku.

Ajo më tej, duke thënë se këto nuk janë vetëm shqetësimet e Grupit Parlamentar ORA, por edhe e të gjithë ekspertëve të shëndetësisë publike dhe ekspertëve të Institutit Kombëtar të Shëndetësisë Publike, ka pyetur qeverinë se “a ka një strategji me të cilën do ta zgjidhë një herë e përgjithmonë këtë problem, së paku në këtë situatë në të cilën ndodhet Kosova, gjithnjë duke pasur parasysh se sa janë mundësitë për shërimin e pasojave të këtyre sëmundjeve?”

“Është shumë më mirë që t`i parandalojmë këto sëmundje”, ka përkujtuar Qeverinë, Fatmire Mullhaxha Kollçaku, njofton Zyra për informim e partisë ORA.

Kuvendi diskuton për veturën “hije”, kushtoi 236 mijë euro!



Kuvendi i Kosovës ka blerë një veturë prej 236 mijë eurosh, por ajo nuk bëhet “e gjallë” askund. Shuma e lartë dhe mungesa e veturës, për të cilën u derdhën aq para, është bërë sot temë debati në Kuvend.
Më nismën e Grupi parlamentar ORA, sot është thirrur në interpelancë ministri i Ekonomisë dhe Financave, Haki Shatri, i cili nga deputet e ORA-së është akuzuar për shkelje të ligjit dhe keqpërdorim të pozitës zyrtare.

Por, ministri Shatri, ka mohuar të ketë shkelje të procedurave ligjore për blerjen e kësaj veture. Sipas ministrit, procedimi i pagesës për këtë veturë është bërë në përputhje me të gjitha procedurat ligjore

Demokratët amerikan dështuan për tërheqjen e trupave nga Iraku
Pas debatesh disajavëshe demokratët amerikane dështuan në senat me propozimin, që parashikonte tërheqjen e trupave amerikane nga Iraku deri në mars 2008. Me gjithë shumicën demokrate në senat vetëm 48 senatorë votuan për propozimin, 50 kundër.
Presidenti Bush kishte deklaruar se do të vinte veton ne rast se projekti miratohet

40 kompani dhe 85 punëtorë të Anamoravës kërkojnë borxhet -“Mabetex Group” mohon të ketë obligime
Dhjetëra udhëheqës të kompanive dhe punëtorë që kanë pasur afarizëm gjatë vitit 2001 me kompaninë “Mabetex Group”, pronë e Bexhet Pacollit, kanë protestuar sot në Gjilan në kërkim të pagesës së borxheve të mbetura nga kjo kompani, ndërkohë përfaqësuesit e kompanisë “Mabetex-Group”, në Prishtinë, theksuan se nuk është e vërtetë t’i kenë borxh ndokujt.
Bardhyl Bajrami e Xhemail Hasani, udhëheqës të këshillit organizativ, thanë se kanë dalë të protestojnë kundër “Mabetex Group”, pasi kjo kompani, 40 kompanive dhe 85 punëtorëve të Anamoravës, u ka borxh mbi 600 mijë marka nga viti 2001 për punët që kanë kryer ata për “Mabetex Grup”, në Gjilan ,Viti, Dardanë e Ferizaj.
Sipas tyre, takimet me përfaqësuesit e “Mabetex Group”, kanë dështuar andaj ata kanë vendosur të protestojnë. “Protesta jonë ka nisë në Gjilan, por në të ardhmen do të protestohet në Prishtinë dhe do të vazhdojë edhe në gjykatë kundër kësaj kompanie”, ka thënë Xhemajl Hasani, në emër të këshillit grevist.

Protesta e mbajtur në platonë para Teatrit Kombëtar në Gjilan, ka kaluar qete dhe pa incidente. Protesta është mbajtur me leje të policisë.


Ndërkohë, përfaqësues të kompanisë “Mabetex-Group”, në Prishtinë, theksuan sot për KosovaLive se nuk është e vërtetë që kjo kompani i ka borxh ndokujt nga rajoni i Gjilanit, madje ata thonë se asnjëherë nuk kanë pas përfaqësi në këtë anë.